სამწუხაროდ, დილიდან ვრცელდება არასწორი ინფორმაცია საქართველოს უნივერსიტეტის სპორტული ინფრასტრუქტურის განვითარების კუთხით. იქმნება შთაბეჭდილება, რომ მიმდინარეობს საზოგადოების მიზანმიმართულად შეცდომაში შეყვანა. გვსურს, საზოგადოებას ვაცნობოთ რეალური ინფორმაცია და საქართველოს უნივერსიტეტის პოზიცია:

პირველ რიგში, საქართველოს უნივერსიტეტის საფეხბურთო მოედანი არის და ყოველთვის იყო მხოლოდ საქართველოს უნივერსიტეტის საკუთრება.  ტყუილია ისიც, რომ ზიანდება  მიწისქვეშა ლაბორატორიები.  საქართველოს უნივერსიტეტი არასოდეს იკადრებს იმას, რომ მსგავსი ინფრასტრუქტურა დააზიანოს - პირიქით, იგი ქმნის და ანვითარებს ლაბორატორიებს.

ჩვენი მიზანია სპორტული ინფრასტრუქტურის განვითარება, რადგან საქართველოს უნივერსიტეტი ჯანსაღი ცხოვრების წესის აქტიური მხარდამჭერია.  თავისთავად, ინფრასტრუქტურის განვითარება მოხდება ზედმიწევნით წესებისა და შესაბამისი ნებართვების საფუძველზე.  ჩვენი სურვილია, რომ ჩვენი სტუდენტები არა თავისუფალი დროის უსარგებლოდ გატარებით იყვნენ დაკავებული - არამედ სპორტით: ცურვით, ჩოგბურთით, ფეხბურთით, კალათბურთით და ა.შ. სამწუხაროა, რომ საქართველოს უნივერსიტეტის ეს მიზანი დისკომფორტს უქმნის ზოგიერთ ადამიანს, რომლებიც, როგორც ჩანს, პირად ამბიციებს ემსახურებიან და კატეგორიულად ეწინააღმდეგებიან ჩვენი ახალგაზრდების სპორტულ განვითარებას.

საქართველოს უნივერსიტეტის მიმართ ხშირად გავრცელებულა სხვადასხვა სახის ჭორი, ცრუ ინფორმაცია. სამწუხაროდ, ეს ხშირად ემთხვევა ერთიან ეროვნულ გამოცდებს. მაგრამ, მიუხედავად ამისა, საქართველოს უნივერსიტეტი განაგრძობს განვითარებას და ის შეინარჩუნებს ყველაზე წარმატებული და პროგრესული იუნივერსიტეტის სტატუსს საქართველოს საგანმანათლებლო სივრცეში.